महोत्तरी । मटिहानीस्थित लक्ष्मीनारायण मठका मान महन्थ जगन्नाथ दास वैष्णवलाई बैंकिङ कसुरसम्बन्धी अभियोगमा प्रहरीले पक्राउ गरेको छ ।

जिल्ला प्रहरी कार्यालय महोत्तरीका अनुसार धनुषा निवासी दीपेन्द्र ठाकुरले दर्ता गराएको जाहेरीका आधारमा वैष्णवविरुद्ध अनुसन्धान प्रक्रिया अघि बढाइएको हो । प्रारम्भिक अनुसन्धानबाट उनीमाथि करिब १ करोड ३० लाख रुपैयाँ बराबरको आर्थिक अनियमितता तथा बैंकिङ कसुरमा संलग्नता रहेको आरोप लागेको प्रहरीले जनाएको ।

शुभकामना

प्रहरी टोलीले उनलाई मटिहानी नगरपालिका–७ स्थित निजी निवासबाट नियन्त्रणमा लिएको हो । पक्राउपश्चात् आवश्यक अनुसन्धान तथा कानुनी प्रक्रिया अघि बढाउन वैष्णवलाई जिल्ला प्रहरी कार्यालय धनुषा पठाइएको महोत्तरी प्रहरीले जानकारी दिएको छ ।

प्रहरी स्रोतका अनुसार वैष्णवविरुद्ध वित्तीय कारोबारमा अनियमितता, विश्वासघात तथा बैंकिङ प्रणालीको दुरुपयोगसम्बन्धी विषयमा विस्तृत अनुसन्धान भइरहेको छ । मुद्दाको प्रकृति गम्भीर रहेकाले आवश्यक प्रमाण संकलन, बयान तथा वित्तीय अभिलेख परीक्षणको काम तीव्र रूपमा अघि बढाइएको जनाइएको छ ।

यसअघि पनि धार्मिक संस्थासँग आवद्ध व्यक्तिहरूमाथि वित्तीय अनियमितताको आरोप लाग्ने गरेका सन्दर्भमा यो घटनालाई अर्थपूर्ण रूपमा हेरिएको छ । यद्यपि, यस प्रकरणमा वैष्णवको संलग्नता र दोषी ठहर हुने वा नहुने विषय अदालतको अन्तिम निर्णयबाट टुंगिनेछ ।

घटनाबारे थप अनुसन्धान जारी रहेको र प्राप्त प्रमाणका आधारमा मुद्दालाई थप सबल बनाइने प्रहरीले जनाएको छ ।